| रचना1 :- |
छत्तीसगढ़ के आदमी एखरे सेती मार खा जाथे।
काबर की एक पाव पीके ओहा मस्तियाथे।।
जहर जैसन करू हावय ये दारू।
तभो ले संगी कतेक सुहाथे ये दारू।।
ये अइसन जहर ए जेन ह दवा कहाथे।
एला पीये बर आदमी कुकूर जैइसे ललचाथे।।
पीके अध्धी पऊवा ओहा नाली म गीर जाथे।
मौका पाके खोरकींदरा कुकूर मुँह मूत जाथे।।
मनखे अपने हाथ म संगी अपन निंदा कराथे ।
छत्तीसगढ़ के आदमी........................
भाई-भाई ल लड़ाथे,दाई-ददा ल रोवाथे ये दारू।
बड़े-बड़े मनखे कंगला हो जाथे, हितवा ल बैरी बनाथे ये दारू।।
बाहिर के मनखे ल सनिमा ले जाथे, घर म बाई बर लाठी उबाथे।
लईका घर म परे हे बिमार,फेर कहाँ ले संगी दारू बर पैसा निकल जाथे।।
रंग-बिरंगी पानी बर पैसा ल बोहाथे।
घर के मनखे एकत रुपिया बर तरस जाथे।।
मोला समझ म नई आवय आदमी, काबर अतका नाम कमाथे ।
छत्तीसगढ़ के आदमी.................
मछरी-कुकरी अड़बड़ मिठाथे, घर के करेला साग करु हो जाथे।
ढाबा के कच्चा साग ह मन ल भाथे,सरहा मऊहा के पानी घलो मीठ हो जाथे।।
पर के बुध म होके परबुधिया, ददा ल अब्बड़ खिसियाथे,नई जानय कतका मया करथे महतारी ह।
ननपन के संगी भाई ल भूलाके,बैरी ल हितवा बनाथे ,नौ महीना ले जेन कोंख म राखे का ओखर भाग म लिखे हे गारी ह।।
सोचव तो संगी अइसन काबर होथे,बचपन ले जेन हमर सेवा करे हे ओहा एक दिन रोथे ।
काट-काट के करेजा जेन लईका ल पढ़ाथे, फेर वो लईका काबर नालायेक हो जाथे।।
का करय ओ बाप-महतारी संगी,भाग ओखर मरकी कस फूट जाथे।
छत्तीसगढ़ के आदमी.............................
नशा नाश के जड़ हे कईथे,फेर काबर बंद नई करावय सरकार ह।
पड़ के एखर चक्कर म संगी ,कतको बेंचावत हे घर -बार ह।।
अब तो आंखी ल खोलव,दारू ल घुरवा म मेलव,भीतर-भीतर जेन करेजा ल खात हे ।
छोड़व ये लत ल संगी,बिड़ी-माखुर ल फेंकव,जेन देह ल हमर सनडऊवा बनावत हे।।
पुरखा के चीज-जईजात एक छीन म बेंचा जाथे,एकक पैसा बर मनखे लुलवाथे।
कभू सोचेव हव संगी हमर खून-पसीना के कमई ह,कैसे ये दारू म फूंका जाथे।।
पहिली तो मनखे सोचय नहीं, बाद म नशा करईया पचताथे ।
छत्तीसगढ़ के आदमी..........................
बलभद्र वर्मा
भाटापारा छ.ग. 493118
|
-picsay.jpg)
